Spinghar Momand Curative and Teaching Hospital

سپین غر مومند پنځوس بستریز معالجوي روغتون (سپین غر پوهنتون (ننګرهار) تدریسي روغتون) پېژندنه:

سپين غر مومند پنځوس بستریز معالجوي او تدريسي روغتون د سپين غر پوهنتون(ننګرهار) تدريسـي روغتون دی، چې په ۱۳۸۸ هـ ش کال کې يې فعاليت پيل کړی او تر دې دمه يې په ګڼو روغتيايي برخو کې پراخه باکیفیته، معیاري، معالجوي، تدريسي او تخصصي خدمتونه وړاندې کړي/وړاندې کوي.

دا روغتون د عـمومي داخـله، عمومي جراحي، کوچنیانو داخله، نسایي ولادي، انتاني، توبرکلوز، فزیوتراپي، وقایوي او عدلي طب، سترګې، غوږ، پوزې او ستوني، جلدي، عقلي او عصبي، نسخه لیکنه، داخله، جراحي او اطفالو ستوماتولوژي، پراستودونټک، اورتودنسي، پریودنټولوژي، بیوشیمي، مایکالوژي او بکتریالوژي، هیماتولوژي، هستوپتالوژي، پرازیتولوژي، ايمیونولوژي او سیرالوژي، وایرولوژي، وینې بانک او ټوکسیکولوژي څانګې لري، چې د سيمې په کچه د مجربو متخصصو ډاکترانو په درلودلو سره د مجهزو طبي وسايلو پرمټ د ګڼو ناروغيو غوره تشخيص او ډاډمنه درملنه کوي.

ياد روغتون له تېرو نږدې پینځلس کلونو راهيسې د اوږدې مخینې او نېک شهرت په درلودلو سره د ولس په زړه او ذهن کې ځای لري، چې د روغتون مؤسس، مشـرتابه او ټول کاري ټيم د ولس شته باور ساتلو ته ژمن دي او د شونتيا تر بريده به په بې پرې ډول، د معالجوي خدمتونو وړاندې کولو سربېره، خپلو محصلانو ته د عملي تدريس غوره چاپېريال زمينه رامنځته کړې ده، څو د هېواد روغتیايي سکتور ته وړ، مسلکي او په کار پوه متخصصین، ډاکتر، ټکنالوجېستان، نرسان او ستوماتولوګ ډاکتران وړاندې شي.